البركاك: وا السي الرايس! فينك يا؟ الرايس: شكون انت؟ البركاك: وايلي أصاحبي! صافي انسيتي؟ الرايس : آه!! ولد حادة! وا كي داير؟ فينك؟ البركاك: هانا في لبلاد كنتقلى! و أنت؟ الرايس : ها نا أولدي كنتبرد في الشمال! البركاك: فرحاتك أخويا! واش داك للشمال؟ الرايس: الخدمة أولدي! واكل، شارب، نوري لوجي! مهاليين فينا الحمد لله! البركاك: إيه أولدي! شكون دبر ليك على هذا الخدمة؟ عقلتي ملي كنتي تفرقي ال50 درهم و ال20 درهم على الكوانب؟ الرايس : الدكاء أولدي! الدكي هو اللي يعرف يجبذ لفلوس فين ما كانوا و بأية طريقة! و هذا تبزنيس بحال جميع التبزنيزات: فرقت لفلوس باش نربح لفلوس، فيها شي عيب؟؟ البركاك: عندك الحق أولدي! و لكن واش ما كتفكرش في دوك الناس اللي واعدتيهم تدير ليهم و تدير ليهم….؟ الرايس : وا سير أمولاي! أنت راك مغفل! اللي وصل لهذا المنصب كايتسابق مع الوقت باش إرد افلوسو و يربح فلوس كثيرة ما تعرف آش تجيب الوقت! البركاك: أهادوك لكلاب اللي كتنبح؟ و هذوك المسقفون اللي تيكتبوا عليك؟ الرايس : إكتبوا حتى يعياوا! و ينبحوا حتى يعياوا و لا كاع لا يعياو! أنا اللي فراسي فراسي! لفلوس هي كلشي! نهار توقع شي حاجة نهاز ابليزتي و نزيد و ما عند حد ما يدير ليا!………….كول ليا!! آش داروا في المهيرجان ديالهم؟؟ البركاك: راهوم………..(انقطع الإتصال) الرايس : ألو! ألو!!! تمت ليه التعبئة لهذا لحمار، خاصني نرسل ليه شي تعبئة! واحد شوية………. البركاك: ألو الرايس!!!!اسمح لي، راه ما بقاتش عندي التعبئة! كنت كانكوليك راهوم وحلو في الما و الضو!! الرايس : خليهوم باش إعرفوا مع من كيلعبوا! بقات في الكتبة و الهدرة الخاوية! لفلوس أولدي لفلوس، اللي عندو لفلوس ما يخافش!! البركاك: شوف! غير اتهلا فيا و نعيط عليك في كل وقت باش نقوليك فين وصلوا! الرايس: أسيدي غير دير شغلك و اللي بغيتيها كاينة! بغاو يحيدوا لي رزق ولادي؟ و الله لا تزاكلت معهم!! واش عرفتي شحال كنت غادي نربح في هذا المهرجان كون نظماتو الجماعة؟ على الأقل ندير ليه واحد الميزانية ديال 30 مليون و نضرب منها واحد ال15 مليون. البركاك: فراسك راه كيتربصوا بك! الرايس : آش كلتي؟ آشنو \”كايتربصوا بك\”؟ اعذرني راه ما قاريش! البركاك : باغيين يبنيو ليك شي فخ! و لايني ما فيديهمش! الرايس : كن هاني فران و قاد بحومة! وا خا ما قاريش راه كنتقن المحاسبة الإختلاسية! و ما كانخليش شي أثراللي تورطني! البركاك: المهم كلشي غادي إوصلك على المناورات ديالهم! أجي يا و أنت ما خايفش من القانون؟ الرايس : القانون!! علاه عندنا شي قانون في هذا لبلاد؟ لعتابي غير ضربو لكرشو و تهنا. البركاك: أسيدي تبارك الله عليك راك واعر! عرفتي، كلشي كيخاف منك في لبلاد و كلشي كيدعي معك. ملحوظة: أرجو المعذرة لمحبي اللغة العربية فقد إخترت العامية لأسمح للمرسل إليه أن يفهم لعل ما تبقى لديه من ملغرامات حية في دماغه تنفعه في صحوة ضميره.
المصدر: إوس نتمازيرت نشر في أزيلال أون لاين